preloader
Scroll to top

Yanditswe na Ferdinand ManiraguhaKuya 19 Ugushyingo 2019 saa 02:31

Guhera tariki 21 Ugushyingo kugeza tariki 4 Ukuboza, i Gikondo hazabera imurikagurisha ry’ibyakorewe mu Rwanda (Made in Rwanda) rizaba ryiganjemo udushya twakozwe n’abanyarwanda hagamijwe guteza imbere ubukungu bw’igihugu.

Iri murikagurisha rizafungurwa ku mugaragaro ku wa Gatanu tariki 22 Ugushyingo, byitezwe ko rizitabirwa n’abamurika basaga 400, ndetse n’abakiliya basaga ibihumbi ijana mu gihe cy’ibyumweru bibiri.

Umuyobozi Mukuru ushinzwe ibikorwa mu rugaga rw’abikorera (PSF), Faustin Karasira, mu kiganiro n’abanyamakuru yavuze ko kuri iyi nshuro bifuza ko abanyarwanda bitabira ku bwinshi bakabasha kwibonera itandukaniro n’ubwiza bw’ibikorerwa mu Rwanda.

Ati “Ni ubwa mbere sinema izaba ibashije kwitabira iri murikagurisha. Ubu ku nshuro ya mbere twanateguye National Business Forum, inama izahuza abikorera n’abafatanyabikorwa bakaganira ukuntu twarushaho kunoza no kwagura umusaruro w’ibikomoka ku bikorwa na serivisi bikorerwa mu Rwanda. “

Karasira yavuze ko ingingo z’ingenzi zizaganirirwa muri iyo nama izaba tariki 3 Ukuboza harimo uburyo bwo kongera umusaruro no guhaza amasoko, uburyo bwo gutsura ubuziranenge bw’ibyakorewe mu Rwanda, uburyo bwo guhanga udushya no gukora ubushakashatsi ndetse n’uburyo bwo kumenyekanisha ibyakorewe mu Rwanda.

Iri murikagurisha rizaba ryitabiriwe n’abamurika bo mu nzeo zitandukanye zirimo ikoranabuhanga, inganda, ubuhinzi n’ubworozi, ubugeni n’izindi.

Mu myaka mike ishize, u Rwanda rwagiye ruzana ishoramari rikomeye nk’uruganda ruteranya imodoka rwa Volkswagen, telefone, imodoka na moto bikoresha amashanyarazi n’ibindi.

Karasira yavuze ko ibyo byose bizaba biri mu imurikagurisha rya Made in Rwanda uyu mwaka.

Umuyobozi Mukuru ushinzwe guteza imbere Inganda n’abikorera muri Minisiteri y’Ubucuruzi n’Inganda, Kamugisha Samuel, yavuze ko nyuma y’ubukangurambaga bwa Leta y’u Rwanda bugamije guteza imbere ibyakorewe mu gihugu, babonye impinduka.

Ati “Ikigaragara cyo hari amahirwe menshi ya Made in Rwanda, urebye abanyarwanda bari kugenda bihangira imirimo ni benshi. Twagiye tubona ko sosiyete za vuba ziri mu Rwanda ziciriritse zisaga 90 % ni iz’ibyakorewe mu Rwanda, bigaragara ko ari inyungu nyinshi.”

Zimwe mu mbogamizi abanyarwanda bakigaragaza ku byakorewe iwabo ni ibiciro bihanitse mu gihe abikorera bo bagaragaza ko ibyo bakoramo ibicuruzwa n’uburyo bvwo gupfunyika bigihenze.

Kamugisha yavuze ko batangiye korohereza abakora ibyakorewe mu Rwanda babakuriraho imisoro imwe n’imwe, naho kubyo gupfunyika ngo bari kuvugana n’inganda mpuzamahanga zibikora uburyo bakorana n’u Rwanda bikahagera bidahenze kandi btabangamiye ibidukikije.

Rutaganda Emmanuel, umwe mu bagize sosiyete AMG Group ihurije hamwe sosiyete 40 zikora imyenda, yavuze ko ubu batangiye kwegera inganda zicuruza ibitambaro mu mahanga ngo barebe uko bagabanyirizwa ibiciro, kugira ngo n’ibyo bakora bigere ku banyarwanda bihenduttse.

Ati “Kuba igiciro kijya hejuru harimo kuba ibikorwa n’ibishakwa ari bike. Umuntu ajya mu Bushinwa akazana kontineri imwe kandi dukeneye kontineri ijana.”

“Ku bitambaro bikenewe, hari uruganda twagiranye ubufatanye mu Bushinwa ku buryo tutazongera kugura ibitambaro tubiguze ku wabiguze akongera akabigurisha, ku buryo mbere hashoboraga kuzamo abakomisiyoneri bane. Ubu tuzajya tugura ibitambaro bivuye mu ruganda ako kanya , bivuze ko wa mwenda twabonaga ugura ibihumbi 40 ku isoko, ushobora kugurwa ibihumbi 6.”

Imurikagurisha ry’ibyakorewe mu Rwanda uyu mwaka kuryinjiramo hazifashishwa uburyo bw’ikoranabuhanga bwo kugura amatike hifashishijwe telefone (mobile Money).

Imyaka isaga itatu irashize Guverinoma y’u Rwanda itangije gahunda Made in Rwanda igamije kugabanya umubare w’ibitumizwa mu mahanga watumaga ubukungu bw’igihugu butazamuka uko bikwiye.

Mu mezi atandatu abanza ya 2019, muri rusange ibicuruzwa byoherezwa mu mahanga byiyongereye ku gipimo cya 58.1%. Umusaruro uturutse ku byoherezwa mu mahanga wazamutse ku kigero cya 7.5% ugera kuri miliyoni 577.8 z’amadolari ya Amerika, uvuye kuri miliyoni 537.3 z’amadolari ya Amerika.

Umuyobozi Mukuru ushinzwe ibikorwa mu rugaga rw’Abikorera (PSF) Faustin Karasira, yavuze ko kuri iyi nshuro bifuza ko abanyarwanda bitabira ku bwinshi bakabasha kwibonera ubwiza bw’ibikorerwa mu Rwanda

PSF ivuga ko iri murikagurisha rizafungurwa ku mugaragaro kuwa Gatanu tariki 22 Ugushyingo, byitezwe ko rizitabirwa n’abamurika basaga 400

Umuyobozi Mukuru ushinzwe guteza imbere Inganda n’Abikorera muri Minisiteri y’Ubucuruzi n’Inganda, Kamugisha Samuel, yavuze ko nyuma y’ubukangurambaga bwa Leta y’u Rwanda bugamije guteza imbere ibyakorewe mu gihugu, babonye impinduka

Abanyamakuru n’abandi bafatanyabikorwa ba PSF basobanuriwe birambuye ibizaranga Expo ya Made in Rwanda igiye kuba

Amafoto: Dushimimana Ami Pacifique

Related posts